Banda de Música Municipal de Burela

Preparando o próximo concerto

2012-01-26T20:39:00.003Z

Despois do concerto de Reis que demos o pasado día 7, xa estamos a preparar as próximas actuacións da banda, que terán lugar no marco das Letras Galegas e das festas patronais de Burela. Desta volta, as pezas que interpretaremos serán fundamentalmete do repertorio galego, da autoría de compositores como Gustavo Freire, Gregorio Baudot, Hixinio Cambeses ou Pascual Veiga.

Para ir abrindo boca, deixámosvos un vídeo da obra Airiños Aires, do compositor lucense Gustavo Freire, interpretada pola Banda de Música Airiños do Morrazo.

A Banda na semana da mobilidade. Setembro 2011

2012-01-12T20:18:00.004Z

Deixámosvos as fotos do pasarrúas que deu a Banda de Burela con motivo da semana europea da mobilidade o mes de setembro do pasado ano. As fotografías, como sempre, de Carlos Andrade.

Concerto de Reis 2012. Programa de man.

2012-01-07T01:30:00.004Z

Disponibilizamos, en formato de fácil lectura, o programa de man do Concerto de Reis da Banda de Música de Burela. Agardamos que sexa do voso interese.

Open publication - Free publishing - More banda

Concerto de Reis 2012

2012-01-05T20:59:00.018Z

A Banda de música de Burela, que onte participaba na cabalgata de Reis de Burela, xa se prepara para a súa próxima actuación. A Asociación de Amigas e Amigos da Banda de Burela organiza para o próximo sábado, 7 de xaneiro, ás 20:30 horas, no auditorio da Casa da Cultura, un concerto da Banda de Música de Burela. Neste concerto, que xa é tradición por estas datas e que este ano leva por nome "Concerto de Reis", a banda interpretará pezas de concerto do repertorio para banda, pasodobres galegos, bandas sonoras, así como arranxos de obras clásicas e temas modernos para banda.

Desde a Banda de Burela queremos convidar á veciñanza de Burela a este concerto tan especial para nós e que é a nosa tradicional forma de dar a entrada ao ano novo, no que ademais terá lugar a estrea oficial de novos músicos que se incorporaron recentemente á banda.

A entrada, de balde.

Ensaios para o concerto de Reis

2011-12-23T20:08:00.008Z

Voltamos publicar o calendario de ensaios para o Concerto de Reis. Como podedes ver faremos dous ensaios a maiores dos que estaban marcados. Ademais, está previsto que participemos na cabalgata de Reis en Burela, o xoves día 5 de xaneiro. Lembrarvos tamén que o ensaio do día 7 será no auditorio. Como sabades tamén podedes consultar os días de ensaio no calendario google da Banda que tedes nun post anterior, neste mesmo blogue.

Jazz Suite Nº2. Valse 2

2011-12-01T20:03:00.007Z

O Segundo Valse da Suite de Jazz Nº2 de Dimitri Shostakovitch, será outra das pezas que prepararemos para o concerto de Reis que terá lugar o sábado 7 de xaneiro. Déixovos un vídeo desta coñecida peza, que o compositor ruso compuxo despois de 1956 e que forma parte dunha obra en 8 movementos chamada Suite for Variety Orchestra e que durante moito tempo foi confundida coa Suite de Jazz Nº 2 do mesmo compositor. Entre outras cousas, esta composición destaca pola súa instrumentación, que inclúe entre outros instrumentos 2 saxos altos, 2 tenores, vibráfono, guitarra, harpa, celesta, 2 pianos, acordeón, etc.

Nós tocaremos un arranxo deste Segundo Valse para banda do compositor belga André Waignein.

Lémbrovos que este sábado o ensaio será da maneira que segue:

10:45-12:00 horas. Seccional trompetas
12:15-14:00 horas. Ensaio xeral

Ensaiaremos Nun mercado Persa e Miña terra Galega, e entregaranse as partituras do Valse de Shostakovitch.

Nun Mercado Persa

2011-11-25T01:05:00.006Z

Tal como se indicou no calendario de ensaios publicado a pasada semana, este sábado faremos ensaios parciais do seguinte xeito:

Clarinetes: 10:45-12:00 horas
Saxofóns: 12:15-13:30 horas

Mentres tanto, déixovos un pouco de música para ir amenizando o estudo do repertorio. Trátase da peza Nun Mercado Persa, de Albert W. Ketèlbe y. Paga a pena escoitala e visualizar a partitura.

Ensaios para o concerto de Reis

2011-11-17T20:12:00.003Z

Estamos de campamento!

2011-08-23T23:11:00.016+01:00

Onte daba comezo no camping da Devesa, o campamento musical "Ao son da banda" organizado pola Asociación de Amigas e Amigos da Banda de Burela e que se prolongará ata o próximo sábado. Neste campamento musical participan nenos e nenas das bandas de música de Burela e Guitiriz e ten unha finalidade lúdica e didáctica. Por unha parte trátase dun curso intensivo de música no que se traballa repertorio de banda principalmente, así como distintos aspectos relacionados con esta formación, e por outra parte é un campamento con carácter lúdico e de lecer, no que os rapaces e rapazas poden realizar distintas actividades programadas polos monitores.

Na tarde do luns houbo un obradoiro de música pop, impartido polo músico de Burela Manolo Maseda, membro de grupos como Os Diplomáticos ou Serra-lhe aí. Maseda é profesor de música no Bacharelato de Artes e fixo unha interesante achega á música pop desde un punto de vista práctico, facendo partícipes aos nenos e nenas da elaboración de estruturas harmónica simples partindo dalgunhas das pezas máis coñecidas da música pop.

No curso imparten clase tres profesores que se encargan das distintas seccións instrumentais. Roberto Bouça: vento madeira; Abel Riveira: vento metal e Israel Arranz: percusión.

O sábado 27 finalizará este campamento con un concerto que terá lugar no propio camping da Devesa ás 12:00 horas.

Campamento musical "Ao son da banda". A Devesa, do 22 ao 27 de Agosto

2011-08-17T20:08:00.005+01:00

A próxima semana terá lugar o campamento musical da Banda de Música de Burela no camping da Devesa. Iremos en coches particulares e saíremos todos e todas da Escola de Música ás 10:30 horas. A duración do campamento será desde o luns 22 ao sábado 27 e realizaremos ensaios de banda polas mañás e actividades lúdicas polas tardes. Podedes consultar o horario en PDF.

Estes venres, día 19 faremos unha reunión informativa na Escola de Música ás 12:00 horas para concretar detalles e aclarar dúbidas, aínda que xa vos adiantamos o material que ides precisar:

MATERIAL PERSOAL:

Roupa cómoda (chandal, pantalóns de deporte, camisetas, sudadeira, tenis, gorra, mudas, pixama)
Saco de durmir
Baño: bañador, toalla de praia e protección solar.
Aseo: cepillo dentes, pasta dentífrica, xel baño, champú, toalla, chanclas

MATERIAL DE TRABALLO:

Instrumento
Papel pautado
Lápis e goma

DOCUMENTACIÓN:

Documento Identidade
Tarxeta sanitaria

Calendario de verán

2011-07-09T11:19:00.007+01:00

Este é o calendario de ensaios da banda para os meses de xullo e agosto. Como vedes, colleremos vacacións na primeira quincena de agosto. A terceira semana de agosto terá lugar o campamento musical "Ao son da banda" no camping da Devesa. Daremos máis información sobre este curso.

Festas de Burela 2011

2011-06-01T09:38:00.033+01:00

As bandas de música de Guitiriz e Burela daremos un concerto conxunto o próximo sábado, 4 de xuño, ás 18:00 horas na praza do concello. Este concerto enmárcase dentro da programación das Festas Patronais de Burela para este ano, e nel interpretaranse pezas de concerto, pasodobres, muiñeiras, unha selección de boleros, así como unha selección de temas do grupo de pop Abba. Salientar que tamén será interpretado o pasodobre Burela, composto por Israel Arranz e que foi estreado o pasado 13 de maio pola banda de Burela, polo que esta será unha boa oportunidade para que as persoas que non puideron asistir á súa estrea, podan escoitar o pasodobre Burela neste concerto das festas.

Ao finalizar a misa das 21:00 horas, ambas as bandas tamén participarán na procesión que acompañará a Virxe do Carme desde a igrexa parroquial ata o porto de Burela, súmandose deste xeito a outras agrupacións musicais que tradicionalmente participan nesta procesión, como é o caso do grupo de gaitas de Ledicia, a Coral Polifónica de Burela e a banda de cornetas Sto. Inocencio de Teixeira.

As bandas de Guitiriz e Burela xa teñen colaborado noutras ocasións, no marco da Unión Musical de Bandas do Norte, proxecto no que tamén participan outras bandas como Guntín, Cedeira ou Ortigueira e que busca dinamizar a cultura musical no norte galego e fomentar o intercambio entre os músicos e os directores das distintas bandas.

Concerto de homenaxe a J. Antonio Chao e estrea do pasodobre Burela na súa memoria.

2011-05-08T20:36:00.048+01:00

A Banda de Música de Burela dará un concerto o próximo venres, 13 de maio, ás 21:30 horas no auditorio da casa da cultura de Burela.

Este concerto foi preparado con moito cariño e dedicación e será moi especial para a banda, pois estará dedicado a José Antonio Chao Basanta, compañeiro que nos deixaba para sempre o pasado ano. Esta será a nosa sentida homenaxe a un home exemplar, tanto polo humano da súa persoa como pola paixón e a responsabilidade coa que vivía a música e a banda.

Neste concerto, ademais, estrearemos o pasodobre que leva por título Burela, composto por Israel Arranz Carreño, percusionista e subdirector da Banda de Música de Burela. O pasodobre Burela está dedicado aos veciños e veciñas de Burela e composto na memoria de José Antonio Chao.

O programa do concerto completarase con obras do repertorio galego para banda, ao estar inserido nas actividades que se celebrarán estes días con motivo das letras galegas.

A Asociación de Amigas e Amigos da Banda de Burela e o director da banda, Roberto Bouça, queren convidar a todos os veciños e veciñas de Burela a este concerto tan especial.

Presentación da revista O Trasno

2011-04-27T18:46:00.008+01:00

O próximo sábado, 30 de abril, a Banda de Música de Burela participará, xunto coa Coral Polifónica de Burela, na de presentación da revista O Trasno, organizado polo Colectivo Cultural Buril. O acto terá lugar ás 20:00 horas da tarde no auditorio da casa da cultura de Burela.

O ensaio para a preparación do concerto será o sábado pola mañá no auditorio, de 11:00 a 14:00 horas.

Próximo ensaio: sábado de 16:30 a 18:30 h.

2011-03-31T12:14:00.014+01:00

O próximo sábado, 2 de abril, faremos o ensaio da banda pola tarde, de 16:30 a 18:30 horas. Nas vindeiras semanas voltaremos ao noso horario habitual, sábados de 10:30 a 13:30 h. e faremos tamén algún ensaio por seccións para a preparación do próximo concerto da banda, que terá lugar o 13 de maio, na casa da cultura de Burela.

Déixovos as fotos da viaxe que nos tirou o noso fotógrafo oficial C. Andrade. Podedes velas todas no álbum web Picasa da Banda de Música de Burela.

Para aqueles e aquelas que non viaxaron a Compostela o pasado 20 de febreiro para asistir ao concerto da Banda Municipal de Santiago, déixovos un vídeo dunha das pezas que interpretaron: Into the Joy of the Spring, de James Swearingen:

Amigas e Amigos da Banda de Burela organiza viaxe a Compostela

2011-02-13T22:11:00.012Z

A Asociación de Amigas e Amigos da Banda de Burela organiza para o próximo domingo, 20 de febreiro, unha viaxe didáctica a Santiago de Compostela para asistir ao concerto da Banda de Música Municipal de Santiago, que terá lugar ás 12:00 horas no Teatro Principal desta cidade.

O programa de concerto leva por título Solistas da Municipal e consta das seguintes obras:

Marcha Florentina. I. Fucik
As vodas de Fígaro. W.A. Mozart
Concerto para trompeta. A. Arutunian (solista: J. Lois Diéguez)
Othello. A. Reed
Into the joy of spring. J. Swearingen

Aqueles e aquelas que desexen asistir ao concerto deberán avisar á directiva da asociación ou ben ao director da banda antes do xoves, día 17. As nais e pais que queiran vir, poden acompañarnos ata completar as prazas do autobús. A hora de saída, será ás 9:00 h. da Escola de Música. Comeremos en Compostela e faremos unha visita pola cidade durante a tarde. A hora de chegada a Burela será entre as 20:00 e as 21:00 horas aproximadamente.

Concerto de Ano Novo

2011-01-04T19:07:00.008Z

A Banda, durante o concerto de Ano Novo do pasado ano. Carlos Andrade

O próximo venres, 7 de xaneiro, ás 20:30 horas, no auditorio da Casa da Cultura, a Banda de Música de Burela dará o seu tradicional concerto de Ano Novo, no que se interpretarán pezas de concerto do repertorio para banda, pasodobres galegos, así como arranxos de temas modernos para banda. A entrada será de balde.

Desde a Banda de Burela queremos convidar á veciñanza de Burela a este concerto tan especial para nós, para o que dedicamos moito tempo e esforzo, e que é a nosa tradicional forma de dar a entrada ao ano novo.

Concerto na Residencia dos Maiores. Carlos Andrade

O pasado xoves, 30 de decembro, a Banda de Música de Burela tamén ofreceu un concerto, desta volta na Residencia dos Maiores de Burela. No concerto interpretaronse distintos pasodobres do repertorio tradicional, así como unha selección de boleros.

A Banda de Música de Burela deséxalles un moi feliz 2011!

Ensaios e concertos para o Nadal

2010-12-22T15:43:00.004Z

Aquí tedes o calendario de ensaios e concertos para este Nadal. Comezamos coa actuación no Festival de Nadal da Escola de Música Municipal o 22 de decembro. O próximo día 30 faremos un concerto na residencia dos maiores de Burela ás 17:00 h. e rematamos co Concerto de Reis no auditorio da casa de cultura, o venres día 7 de xaneiro, ás 20:30 horas.

Felices Festas a todas e a todos e próspero ano 2011!

Asemblea xeral da AABB

2010-12-13T02:03:00.006Z

A AABB (Asociación de Amigas e Amigos da Banda de Burela), convoca aos seus socios e socias a unha Asemblea Xeral o próximo sábado 18 de decembro, ás 12:30 en primeira convocatoria e 13:00 horas en segunda convocatoria, que terá lugar na aula de Banda da Escola de Música.

A Banda de Música de Burela no programa Luar da TVG

2010-10-14T20:32:00.015+01:00

Disponibilizamos o vídeo da actuación da Banda de Música de Burela o pasado venres 8 de outubro no programa Luar da TVG.

Esperamos que gostedes!

Concerto da Banda nas San Lucas

2010-10-11T22:29:00.004+01:00

O próximo domingo, 17 de outubro a Banda de Música de Burela actuará na festa das San Lucas en Mondoñedo. Faremos un pasarrúas ás 12:00 horas e un concerto na praza de Jaime Cabot ás 13:00 horas. No caso de que o tempo non acompañe o concerto realizarase no Auditorio Municipal.

Podedes descargar o programa completo das festas aquí.

Comeza o curso 2010-2011

2010-09-18T13:18:00.008+01:00

O próximo luns, 20 de setembro comezan as clases do curso académico 2010-2011 na Escola de Música Municipal de Burela, e con el iníciase tamén o calendario habitual de ensaios da banda, mantendo os horarios do curso anterior: sábados pola mañá de 10:30 a 13:30 horas. Como sempre faranse ensaios seccionais en ocasións puntuais que serán indicados con antelación e tamén se programarán máis ensaios en distintos momentos, como por exemplo nas vacacións de Nadal para preparar o concerto de Ano Novo.

Adiantaranse calendarios de ensaios e actuacións coa suficiente antelación. As actuacións máis inmediatas serán:

Sábado, 25 de setembro: Cedeira. (Saída aproximada de Burela: 16:00 horas)
Venres, 8 de outubro: Programa Luar da TVG. (Saída aprox.: 16:00 horas)

Moito ánimo a todas e todos para este novo curso!

Concerto da Banda do Norte en Ortigueira

2010-07-26T17:44:00.003+01:00

O próximo mércores 28, a Banda do Norte dará un novo concerto, que desta volta terá lugar en Ortigueira, na praza de Isabel II ás 19:00 horas.

Actuación en San Cibrao

2010-07-13T12:51:00.004+01:00

Este xoves, actuaremos en San Cibrao nas Festas do Carme. Faremos pasarrúas e procesión. A saída é ás 18:00 horas da Escola de Música.

Próximos ensaios

2010-07-05T23:08:00.011+01:00

Foto: Banda do Norte en Guitiriz. Andrade

O próximo mércores e xoves teremos ensaio xeral de 10:30 a 13:30 horas. Fica suspendido o ensaio que estaba programado para o venres.
O xoves da próxima semana teremos actuación nas Festas do Carme de San Cibrao. Confirmarase o horario de saída.

A Banda do Norte en Guitiriz

2010-06-24T14:26:00.004+01:00

O próximo sábado, 26 de xuño, a Banda do Norte dará un novo concerto, desta vez en Guitiriz, na Praza do Campo da Feira, ás 19:00 horas. A saída de Burela para Guitiriz será ás 16:00 horas da Escola de Música. Iremos vestidos co traxe da banda, con garabata e sen chaleco.

Calendario de actuacións para o verán

2010-06-10T00:39:00.011+01:00

Estas son as actuacións e os ensaios para os próximos meses. Iranse adiantando os horarios para os distintos desprazamentos indicados. Eventualmente, poderá programarse algún ensaio seccional ou xeral a maiores. Se non se indica o contrario, os ensaios marcados serán xerais en horario de 10:30 a 13:30 horas.

Podedes descargar aquí o calendario por meses:

Festas de Burela 2010

2010-06-02T15:18:00.016+01:00

O próximo sábado, 5 de xuño, varias bandas de música participarán nas actividades programadas con motivo das festas populares deste ano.

Para comezar, ás 18:00 horas terá lugar na praza do Concello, un concerto a cargo da Banda do Norte, formación musical integrada por bandas do norte galego, entre as que se encontran as bandas de Cedeira, Ortigueira, Guitiriz, Guntín e Burela. O repertorio estará formado por pezas de distintos estilos que van desde obras de tipo sinfónico a arranxos de bandas sonoras e músicas modernas, pasando por pezas tradicionais como pasodebres, xotas e muiñeiras.

Xa ás 21:30 horas, a Banda de Música Municipal de Burela participará na procesión de baixada da Imaxe ao Porto, organizada pola SCR Ledicia.

Programa completo das festas de Burela aquí.

Festa da Marosa 2010

2010-05-07T01:43:00.005+01:00

Despois da grata experiencia do pasado ano, a Banda de Música de Burela estará de novo na Festa da Marosa na súa 12+2 edición.

O próximo sábado, 15 de maio, ás 13:00 h. na praia da Marosa, interpretaremos a Marcha da Marosa xunto con outros músicos e músicas da vila, composta especialmente para esta festa polo gaiteiro Edelmiro Fernández. A partir das 13:30 h. daremos un concerto na explanada do porto para amenizar a sesión vermú, que parace que ano tras ano se vai afianzando nesta Festa da Marosa. A continuación, todos e todas poderemos disfrutar do xantar a base de cocido que prepará o persoal da Asociación Palestina.

Agardámosvos!

O próximo sábado imos a Silleda

2010-03-18T01:24:00.004Z

O próximo sábado non teremos ensaio da banda, pois estaremos en Silleda facendo un pouco de jazz con rapaces e rapazas da Banda de Música de Silleda e de Estudio Escola de Compostela. O concerto estará dirixido por José Nine, profesor de saxo, frauta e combo en Estudio Escola e director da Orquestra Xuvenil neste centro de ensino.

O sábado 27 de marzo, non teremos ensaio en Burela. Só haberá ensaio en Guntín (11:00 horas) para aqueles e aquelas que vaian tocar na Semana Santa con esta banda de música.

Retomaremos os ensaios despois das vacacións, o sábado 10 de abril.

Suspendido o ensaio do sábado

2010-02-26T13:12:00.007Z

O ensaio de mañá sábado fica suspendido, por causa do temporal de auga e vento previsto. (Consultar adverso meteorolóxico aquí). A Escola de Música Municipal permanecerá pechada durante todo o día. O próximo sábado, 6 de marzo, teremos ensaio xeral de 10:30 a 13:30 horas.

Aquelas e aqueles que vaian tocar na semana santa, que pasen hoxe pola escola para coller as partituras.

Próximos ensaios

2010-02-18T10:48:00.005Z

O próximo sábado, haberá ensaio seccional de trompetas e bombardinos, de 10:30 a 13:00 horas. Aqueles e aquelas que queiran, poderán vir estudar á escola.

O sábado, 27 de febreiro, teremos ensaio xeral de 10.30 a 13:30 horas.

Ide estudando os papeis novos na casa.

Burela con Haití en imaxes

2010-02-18T10:47:00.012Z

A Banda de Música de Burela, participou entre outras moitas agrupacións musicais da vila, no concerto solidario organizado polo Concello de Burela Tod@s con Haití, que tivo lugar o pasado 30 de xaneiro na Casa da Cultura. Queremos mostrar a nosa satisfacción polo espíritu solidário e participativo que caracterizou a resposta dada por tantos e tantas afeccionad@s à música , dando mostra por outra parte, da pluralidade de estilos musicais que conviven en Burela.

Cantareiras A Arracada da SCR Ledicia

Banda de gaitas e tambores Dambara

Coral Polifónica de Burela

Batuko Tabanka

Banda de Música de Burela

Burela Blues Band

* Todas as fotos de Carlos Andrade.

A Banda no Concerto Benéfico por Haití

2010-01-26T23:33:00.005Z

A Banda de Música de Burela participará no Concerto Benéfico que terá lugar o próximo sábado, 30 de xaneiro, ás 20:30 horas, no auditorio da Casa da Cultura de Burela. No acto estarán presentes distintas agrupacións da vila, como a Coral Polifónica, Ledicia, Batuko Tabanka, Dambara, a Burela Blues Band e a Banda de Música.

O diñeiro recaudado destinarase integramente para a axuda humanitaria ao pobo haitiano.

Non faltedes á cita, paga a pena!

Concerto da Banda

2010-01-07T01:26:00.007Z

A Banda de Música de Burela dará o seu tradicional concerto de Ano Novo-Reis o próximo venres, 8 de xaneiro, ás 20:30 horas no auditorio da Casa da Cultura de Burela.

Serán interpretadas obras orixinais para banda, tanto obras de concerto como pasodobres e xotas do repertorio galego. Tamén soará un arranxo de pezas tradicionais vascas na versión do grupo de folk Oskorri.

Estades tod@s convidados!

Para @s que queiran ir ensaiando a letra:

Furra furra fandangoa,
hortxe duzu fandangoa
geure gustukoa.

Furra furra fandango,
este é o fandango
do que gostamos.

Ensaios de Nadal

2009-12-20T23:00:00.009Z

Este é o calendario de ensaios para o Nadal. Aproveitamos que tedes mais tempo e que a xente que estudades fóra estades por Burela.

Os ensaios serán da forma que segue:

Decembro:

Luns 28: Seccional trompetas, bombardinos e percusión (10:30-13:30) /Ensaio xeral (19:00-21:00)
Martes 29: Seccional v. madeira (10:30-13:30)/Ensaio xeral (19:00-21:00)
Mércores 30: Seccional metal-madeira (10:30-13:30)/E. xeral (19:00-21:00)
Xoves 31: Ensaio xeral (10:30-13:30)

Xanerio:

Luns 4: Ensaio xeral (10:30-13:30)
Martes 5: Ensaio xeral (10:30-13:30)
Mércores 6: Ensaio xeral (10:30-13:30)
Xoves 7: Ensaio xeral (10:30-13:30)
Venres 8: Colocación e proba de son (18:00-19:30)/Concerto (20:30)

Por amor

2009-11-24T21:03:00.005Z

A continuación podedes ler o fermoso relato de Marta Dacosta que aparecía hai uns días na páxina web da Federación Galega de Bandas.

Por Amor

Non o vía. Só podía escoitar os seus reiterados ensaios co clarinete, aquel continuo repetir de escalas, unha e outra vez. Os anos pasaban, e ela notaba como aquel clarinete falaba cada vez un pouco máis claro, e así foise afacendo manseliñamente á súa compaña puntual das seis da tarde.

Nunca o vira, mais cando se atrasaba o ensaio o seu estómago rebulía de nervios e comprendeu que non podía vivir sen escoitar unha e outra vez as pezas que o mozo perfeccionaba incansábel. Sabía o seu nome, porque sentía á súa nai chamándoo ao final da tarde: Artur!

E acabou por se decatar de que non lle interesaba ningún dos mozos do seu instituto e que devecía por coñecer ao tal Artur. Unha mañá de domingo, mentres paseaba cos pais pola Alameda, quedou parada diante da banda, sen poder despegar a súa ollada dos clarinetistas. Imaxinaba a cal deles lle acaería mellor o nome de Artur. Despois de moito pensalo, decidiu que aquel mozo de ollos verdes tiña que ser o que ela escoitaba cada tarde. Si, si, si, aquela peza... si, algunha vez lla escoitara, estaba segura, completamente segura.

Aquela semana andou a contorna da súa casa para ver se topaba co clarinetista da Alameda. Mais non deu resultado. Entón deu en asexar en portas e buzóns para ver se atopaba o seu nome nalgures, e nada. Tentouno unha e outra vez, parou en todos os concertos, asexou a todos os clarinetistas, ía detrás da banda ao remataren e escoitaba con atención. Nunca lle coincidiu atoparse con Artur ningún.

Así que un bo día decidiu matricularse na Escola de música no seu barrio e comezou tomar clases de clarinete. Era tal a súa ansia que en pouco tempo aprendeu a desenvolverse co instrumento e unha tarde, cando Artur rematou o seu ensaio, ela comezou tocar unha das súas pezas favoritas na ventá, con ela aberta de par en par, para que o son chegase alto e claro até o mozo.

Durante días seguiu tocando na ventá. Unha tarde, Artur rematou o seu ensaio antes do habitual. Ela iniciou entón a súa peza e, cando levaba varios compases, outro clarinete se sumou ás súas notas e así, sen se veren, sen se coñeceren, sen nada saber o un do outro, tocaron horas e horas, até que unha lúa redonda e alta inundou o ceo.

Por iso está na banda hoxe, porque se namorou dun clarinetista que ensaiaba ás seis da tarde no inverno, un mozo que lle correspondeu e acompañou os compases dos seus ensaios. Nunca soubo se tiña os ollos verdes ou non, mais xa nin importa, porque o amor quedou moi dentro dela, e sáelle polas mans veloz, pulsando con agarimo e destreza as notas do seu clarinete.

Marta Dacosta
Marzo de 2009.

A Escola de Música reinicia as clases o xoves 15

2009-10-14T18:27:00.006+01:00

A Esola de Música Municipal reinicia as clases o próximo xoves, 15 de outubro, tal e como informan distintos medios. Podedes consultar a noticia no xornal El Progreso de onte (páx. 14) e no Crónica3 de hoxe.

Para máis información podedes contactar con nós.

Ata pronto.

Continúan os ensaios da Banda

2009-09-30T14:08:00.003+01:00

Tal como informábamos onte, había a posibilidade de que a banda continuase cos ensaios que estaban programados para o presente curso 2009-2010, durante o tempo que permaneza pechada a ESMU.

Hoxe podo confirmarvos que así será. Non vos esquezades de que o próximo sábado temos ensaio ás 11:00 horas, polo que debedes ir chegando á Escola a partir das 10:30 para ir montando os instrumentos e facer o quentamento.

Ata entón!

(Ide mirando na casa os papeis que se repartiron o outro día)

A ESMU estará pechada a partir do 1 de outubro

2009-09-29T15:17:00.006+01:00

Como sabedes, as clases da Escola de Música serán suspendidas temporalmente a partir do próximo 1 de outubro por motivos administrativos. Tanto o xornal dixital Crónica3, como a edición dixital da Cope, informan hoxe desta medida.

Sexa como for, a Banda tentará continuar cos ensaios que tiña progamados para o presente curso 2009-2010. Seredes informad@s.

A Banda no Dia sen coches

2009-09-14T09:58:00.004+01:00

A Banda de Burela estará mais un ano na celebración en Burela do Día Europeo sen coches, o próximo sábado, día 19 de setembro. Con este motivo faremos un pasarrúas por Rosalía de Castro e Pardo Bazán a partir das 19:00 horas e un concerto na Praza do Concello ás 20:00 horas. Antes disto poderemos disfrutar coa música da Burela Blues Band que fará un ensaio público ás 16:00 horas na mesma Praza do Concello.

Calendario 7 ao 19 de setembro

2009-09-02T15:30:00.003+01:00

Estes son os ensaios e actuacións que teremos coa banda nos próximos días:

7 de setembro: ensaio, 19:30-21:30
8 de setembro: ensaio, 19:30-21:30
9 de setembro: actuación Festas Ferreira, hora por determinar
12 de setembro: ensaio, 10:30-13:30
19 de setembro: actuación Dia Europeo sen conches (Burela), h. por determinar.

Procesión Festas Burela 2009

2009-08-10T17:32:00.008+01:00

Depois do intenso Seminario de Jazz e Música Moderna que tivo lugar na Escola de Música de Burela do 13 ao 17 de xullo e tras un pequeno parón na actividade do blogue debido a unhas merecidas vacacións, voltamos á nosa actividade. Onte, Domingo 9 de agosto, tocamos en Figueiras, no concello de Castropol, nas festas da vila, onde fixemos unha procesión e un concerto. O próximo fin de semana estaremos tocando de novo: o sábado 15 en Ourol e o domingo 16 na Veiga, mais unha vez na marabillosa ría de Ribadeo. Cando teñamos algunha foto irémola subindo.

Por agora, e cumprindo co prometido, subimos algunha foto e un vídeo da procesión das festas de Burela. Fotos de Carlos Andrade e vídeo e Tomás L. Retorta, aos dous un millón de grazas.

Ensaios e actuacións. Verán 2009.

2009-06-16T00:49:00.007+01:00

Este é o planning da Banda para este verán. @s que non esteades para as datas marcadas, facede o favor de avisar coa suficiente antelación.

Xuño:

O próximo ensaio será este sábado, 20 de xuño, de 10:30 a 13:30 h. como estaba programado.
O sábado, 27 de xuño, non haberá ensaio, por termos os exames de Pase de Grao na Escola de Música.

Xullo:

Este mes non haberá ensaios para que descansemos tod@s un pouco e para que teñades tempo para asistir aos Cursos de Verán da ESMU.

Agosto:

Xoves 6/Venres 7: ensaios de 19:30 a 21:30 h.
Sábado 8: ensaio de 10:30 a 13:30 h.
Domingo 9: Actuación en Castropol.
Martes 11/Mércores 12/Xoves 13: ensaios de 19:30 a 21:30 h.
Sábado 15: Actuación en Ourol.
Domingo 16: Actuación n'A Veiga.

Setembro:

Posiblemente os ensaios comecen na segunda quincena de setembro.

Que teñades un bo verán!

II Seminario de Jazz e Música Moderna de Burela

2009-06-09T23:59:00.006+01:00

Xa está aberto o prazo de matrícula no II Seminario de Jazz e Música Moderna, organizado pola ESMU Municipal de Burela e o Concello de Burela, coa colaboración especial de Estudio Escola de Música.

O Seminario decorrerá entre o 13 e o 17 de xullo e contará cos seguintes profesores:

Leo Giannetto (voz e guitarra)
José Nine (saxo e frauta)
Javier Constenla (piano)
Quique Alvarado (baixo)
Miguel Cabana (batería)

Podedes ver información sobre horarios, contidos do curso e profesorado no cuadríptico do Seminario: I e II, ou ben consultar o blogue do Seminario.

Próximos ensaios

2009-06-07T20:25:00.005+01:00

O próximo sábado, 13 de xuño, non teremos ensaio coa banda, quedando adiado para o seguinte sábado, 20 de xuño, de 10:30 a 13:30 horas.

Cónvocase unha reunión de carácter informativo, para todos os pais e nais e músicos maiores, este sábado, 13 de xuño, ás 12:30 h.

A Banda nas Festas de Burela

2009-06-07T19:45:00.008+01:00

O pasado sábado, 30 de maio, a Banda de Burela actuou no marco das Festas populares da nosa vila. Antes de comezar un pasarrúas, tivemos a honra de recibir, na Casa do Concello a equipa de fútbol sala feminina de Burela, recén ascendida à Primeira División e fixémolo da mellor forma que sabemos: facendo soar os nosos instrumentos.

A continuación tivo lugar un pasarrúas por Rosalía de Castro e Pardo Bazán, que serviu de preludio ao concerto que demos ás 12:30 na Praza do Concello, onde estivemos acompañados por amig@s, familiares e outr@s espectadores e espectadoras que se achegaron a ouvir a nosa música. Moitas a grazas a todas e todos pola vosa a asistencia e polo voso apoio, sen vós, o noso proxecto non tería sentido. Esperamos vervos o próximo ano no tradicional concerto das festas e noutras actuacións da banda.

Todas as fotos de Carlos Andrade. En breve, crónica da procesión das Festas.

Concerto das Festas '09

2009-05-30T00:51:00.003+01:00

Este sábado, 30 de maio, ás 12:30 horas, terá lugar na Praza do Concello, o tradicional concerto das Festas da Banda de Burela.

O programa que interpretaremos é o que segue:

Ammerland.
Miniatures for band.
The pink panther.
John Williams in concert.
Medley Boleros.
Banda Galega.
Abba Gold.

A banda desexámosvos unhas boas festas e todas e a todos!

A Banda na Festa da Marosa

2009-05-21T23:52:00.006+01:00

O pasado venres, 15 de maio, un grupo de rapaces e repazas da Banda de Música inauguraba a Festa da Marosa na súa 12+1 edición, e facíao estreando a Marcha da Marosa, peza composta polo gaiteiro Edelmiro Fernández, con quen tivemos o pracer de tocar esta peza, dedicada a Mariña, filla do burelao Manolo Maseda, un dos principais promotores desta festa, acordeonista e voz en Serra-lhe aí e nos desaparecidos Diplomáticos e antigo músico da Banda de Burela.

Queremos agradecer á organización o teren contado coa nosa formación para inaugurar esta festa, que xa é un referente na vida cultural e festeira da nosa vila e parabenizar, como non, aos rapaces e rapazas que fixeron un grande esforzo para montar esta peza con tan pouco tempo de preparación.

As fotos, como sempre, do noso amigo Carlos Andrade. Carlos, obrigad@s.

Ensaios maio e próximas actuacións.

2009-05-04T18:02:00.005+01:00

A Banda de Música Municipal de Burela terá proximamente dúas actuacións dentro da programación cultural das Festas populares de Burela. A primeira delas, será o sábado, 30 de maio, e consistirá nun pequeno pasarrúas polo centro de Burela às 11 de mañá e nun concerto que terá lugar na praza do Concello, ás 12:30 horas. A segunda actuación será o seguinte fin de semana, concretamente o sábado, 6 de xuño, día no que a Banda participará na procesión da Virxe do Carme, que decorrerá a continuación da misa que se celebra ese mesmo día ás 21:00 horas, na igrexa parroquial.

Quedan tres ensaios antes do 30 de maio, que serán da seguinte maneira:

Sábados: 10:30-13:30, ensaios xerais.

Poderá programarse algún ensaio seccional ou por cordas a maiores algún mércores despois da clase de Cámara, de 21:00 a 22:00 horas, do que seredes avisad@s coa suficiente antelación.

O repertorio que se intrepretará será o que segue:

Educandos de Benejuzar/Banda Galega
Miniatures for band.
John Williams in concert.
The pink panther.
Medley Boleros.
Ammerland.
Banda Galega.
Abba Gold.
Marcha Triunfal/Virxe das milagres.

Concerto da Banda do Norte

2009-05-01T01:12:00.004+01:00

A Banda de Norte dará o seu concerto inaugural o próximo sábado (2 de maio) en Ortigueira, às 20:30 horas, no Teatro da Beneficencia, no marco no II Congreso Internacional de Bandas de Música "Vila de Ortigueira".

Xa pola noite, às 00:30 horas, haberá un concerto do cuarteto de jazz Marosa Jazz Project, no Novo Club Social.

Ensaios en abril

2009-04-04T01:09:00.003+01:00

Con motivo de a Banda de Burela participar na Banda do Norte, temos que modificar algúns dos ensaios que habitualmente temos os sábados en Burela, para que non coincidan cos da outra formación.

O sábado, 18 de abril e o sábado, 2 de Maio non haberá ensaio da Banda de Burela, por termos encontro coa Banda do Norte.

O calendario de ensaios para as próximas semanas queda da seguinte maneira:

· 1 de abril, mércores: 20:00-21:00_bombardinos

· 4 de abril, sábado:

§ 10:00-11:00_clarinetes

§ 11:00-12:00_saxofóns

§ 12:00-13:30_ensaio xeral

· 6, 7 e 8 de abril, (luns, martes e mércores): estarei na Escola de 11:00 a 13:00, para aqueles e aquelas que queirades ver os papeis comigo.

· 15 de abril, mércores: 20:00-21:00_trompetas

· 18 de abril, sábado: NON HAI ENSAIO

· 24 de abril, venres: 20:00-22:00_ensaio xeral

· 25 de abril, sábado:

§ 10:00-11:00_saxofóns

§ 11:00-12:00_clarinetes

§ 12:00-13:00_saxofóns

· 2 de Maio, sábado: NON HAI ENSAIO

A partir do sábado, 9 de maio, os ensaios serán como sempre, os sábados de 11:00 a 13:30, mentres non se indique o contrario.

Desculpade as molestias.

Concerto n'A Coruña

2009-03-19T17:33:00.010Z

O próximo domingo, 22 de marzo, ás 12:15, terá lugar un concerto no Palacio da Ópera d'A Coruña, a cargo do grupo vasco Oskorri e da Banda Municipal d'A Coruña, dirxida polo maestro Marcel Van Bree.

A Banda de Burela asistiremos a este concerto. Se aínda estades interesad@s en vir, podedes poñervos en contacto con nós.

A continuación podedes ver os horarios e programa de actividades:

09:30: Saída da Escola de Música de Burela.
12:15: Concerto
14:00: Xantar
16:00: Visita á Casa das Ciencias

Burela Blues Band en concerto

2009-03-08T16:26:00.004Z

A Burela Blues Band dará un concerto o próximo venres, 13 de marzo, ás 21:30 no auditorio da Casa da Cultura de Burela. Presentarán novos valores e contarán coa presenza de artistas convidados.

Non faltedes!

Concurso

2009-03-02T19:57:00.008Z

A Asociación de Amigas e Amigos da Banda de Burela, convoca un concurso para a elección do deseño que representará a este colectivo. O logotipo gañador será o símbolo que identifique á asociación na súa proxección pública e no relacionamento con outras entidades ou colectivos.

As bases polas que se rexerá o concurso son as seguintes:

Poderán presentarse ao concurso todas e todos os integrantes da Banda de Música Municipal de Burela.
O deseño deberá conter dous elementos principais: un que faga referencia á música e outro que faga referencia a Burela. Deberá estar nun folio formato Din-A4, e poderá ser feito a man ou ben con algún programa informático de deseño.
Valorarase a orixinalidade e a presentación, así como o grao de representatividade do logo, atendendo aos elementos sinalados no punto anterior.
O xurado escollerá de entre todos os deseños presentados, aquel que máis se adecúe aos criterios de selección.
O prazo para presentar os deseños remata o sábado, 14 de marzo do presente ano, ás 14:00 horas.
Os candidatos e as candidatas deberán presentar o seu deseño nun sobre grande, sen que este leve indicación algunha (nome, marca, etc.). Dentro deste sobre introducirán un sobre de menor tamaño cos seus datos persoais (Nome e apelidos, e teléfono de contacto). Este sobre deberá estar debidamente pechado. Os deseños serán entregados ao director da banda.
O gañador ou a gañadora recibirá un premio, consistente en material musical.

A Directiva da Asociación.

Burela, 2 de marzo de 2009.

Ensaio

2009-02-26T23:15:00.004Z

Como se vos comentou no último ensaio, este sábado, 28 de febreiro non haberá ensaio da banda, quedando aprazado para o próximo sábado, 7 de marzo, de 10:30 a 13:30.

O repertorio a traballar será o seguinte:

Miniatures for Band
Ammerland
The Pink Panther
Medley Boleros

Aproveitade estes días para estudar os papeis, sobretodo centrádevos no III movemento das Miniaturas e na Panteira Rosa.

Lémbradevos os percusionistas que o seccional de percusión con Israel continúa en pé.

Cambio de ensaio

2009-02-10T19:48:00.003Z

O próximo sábado, 14 de febreiro non teremos ensaio. Como se vos comentou o sábado pasado, este mércores faremos un pequeno ensaio de 20 a 21 horas, despois de cámara.

Para este ensaio convócase a:

Frautas
Clarinetes
Saxos altos
Trompetas 2ª
Trompa 2ª
Bombardino

Repertorio a traballar:

Miniatures for Band
Ammerland

O sábado da próxima semana (21 de febreiro) teremos ensaio xeral de 10:30 a 13:30.

Amigas e Amigos da Banda de Burela

2009-02-02T12:16:00.007Z

Convócase a todas e a todos os músicos da banda maiores de idade, así como ás nais e aos pais dos músicos menores de idade a unha reunión para o próximo sábado, 7 de febreiro, ás 13:00 horas, a celebrar na Escola de Música Municipal; cos seguies asuntos a tratar:

Presentación dos estatutos elaborados pola Xunta Directiva provisional da Asociación de Amigas e Amigos da Banda de Burela
Debate a aprobación dos estatutos.
Rogos e preguntas.

Nota: Para axilizar a reunión sería interesante que lésedes os estatutos con anterioridade. Podedes descargar o borrador dos estatutos aquí.

Reunión Asociación "Amig@s da Banda"

2009-01-23T00:00:00.006Z

Convócase á Xunta Directiva provisional da Asociación "Amig@s da Banda de Burela", a unha reunión que terá lugar o próximo sábado, 24 de xaneiro, na Escola de Música, ás 16:00 horas, coa elaboración duns estatutos para a asociación como único punto a tratar na orde de traballos.

Disponibilizamos un borrador de estatutos, elaborado na anterior reunión, para que poda ser enmendado polo equipo directivo. Descarga aquí.

Concerto de Ano Novo 2009

2009-01-07T23:25:00.006Z

Como avanzamos en entradas anteriores deste blogue, o pasado sábado, 3 de xaneiro, a Banda de Música deu o seu habitual Concerto de Ano Novo, no que contamos coa presenza de moit@s burelás e burelaos, cun grande número de amigas e amigos e como non, d@s noss@s familiares, que sempre nos apoian nas nosas actuacións.

Desde a Banda de Música Municipal de Burela, queremos agradecer o apoio que nos mostrou todo o público presente e como non, desexarlles un feliz ano 2009 a tod@s!

Temos que agradecer o traballo fotográfico do noso amigo Carlos Andrade, que sempre ten boa disposición para estar aí onde sexa preciso, coa súa cámara preparada para tirar fotos. Graciñas, Carlos! (As fotos, como non podía ser de outra meneira, son do Carlos)

Esperamos estar axiña compartindo a nosa música con tod@s vós. Até pronto!

Reunión

2008-12-19T12:09:00.004Z

O próximo sábado, 20 de Decembro, haberá unha reunión informativa da Banda para todos os pais e todas as nais d@s integrantes da Banda.

Esta reunión celebrarase ás 13:00 horas no local da Banda da Escola de Música Municipal.