Actuacións no Nadal

A Banda de Música de Burela realizará dúas actuacións neste Nadal. A primeira delas terá lugar o próximo mércores, 26 de decembro, na Residencia dos Maiores de Burela, ás 17:00 horas. Nesta actuación a Banda de Burela interpretará pezas do repertorio popular: pasodres, xotas, boleros... Xa para finalizar as festas do Nadal e dar a entrada ao Ano Novo, a Banda dará o seu tradicional Concerto de Reis, que terá lugar o domingo, 6 de xaneiro, ás 20:00 horas no Auditorio Municipal de Burela. Neste concerto interpretaranse obras de tipo sinfónico compostas orixinalmente para banda, así como pezas do repertorio galego para banda e algunha outra sorpresa.

Aproveitamos para convidar a todos os veciños e veciñas de Burela a este concerto tan especial para nós e desexarlles un moi "Bo Nadal e próspero e musical 2013!"

Preparando o próximo concerto

A Banda de Gaitas Dambara e a Banda de Burela no FIL o pasado mes de agosto.

Disponibilizamos as fotos da actuación da Banda de Burela na Feira do Mel en Ferreira do Valadouro e da actuación conxunta coa Banda de Gaitas Dambara na Feira das San Lucas de Mondoñedo. Ámbalas actuacións tiveron lugar o pasado mes de outubro e as fotografías foron realizadas polo noso amigo e colaborador Carlos Andrade.

Tras estas actuacións, a Banda de Burela está a preparar o seu próximo concerto, que terá lugar en xaneiro do próximo ano. Este é un concerto que realizamos anualmente por estas datas e que é o noso tradicional xeito de dar a benvida ao ano novo. Nesta ocasión interpretaremos pezas novas nas que xa estamos a traballar e tamén recuperaremos algunha das pezas que forman parte do noso repertorio e que foron interpretadas en concertos de anos anteriores.

Informaremos proximamente do día e lugar deste concerto, así como doutras actuacións que podan ser programadas.

Lorient visita Burela

O próximo sábado 22 de setembro, terá lugar unha actuación conxunta a cargo da Banda de Gaitas Dambara e a Banda de Música de Burela. Ámbalas dúas agrupacións participaron o pasado mes de agosto no FIL (Festival Intercéltico de Lorient), en representación da delegación galega, xunto coa agrupación de música tradicional As Beiras do Ulla. 

O FIL é o festival intercéltico de maior relevancia a nivel internacional, no que participan agrupacións musicais de todas as nacións celtas: Escocia, Irlanda, Illa de Man, País de Gales, Cornualles, Bretaña, Asturies e Galiza.

A proposta musical que levamos a Lorient a Banda de Gaitas Dambara e a Banda de Música de Burela bebe de dúas fontes principais: por una lado da música tradicional de raíz e por outra banda do repertorio tradicional das bandas de música populares. As pezas están arranxadas para seren interpretadas por unha agrupación que inclúa unha sección ampla de gaitas, percusión tradicional e percusión de corte marcial e unha sección que cubra todas as cordas dunha banda de música. O resultado é unha música con claro sabor a tradición e cunha sonoridade e unha estética de banda marcial que se adapta moi ben a calquera tipo de desfile.

As dúas bandas burelás queremos mostrar aos veciños e veciñas de Burela o traballo realizado na Bretaña con esta actuación do próximo sábado que consistirá nun pasarrúas polas principais rúas de Burela a partir das 18:00 horas. Ás 19:00 horas presentarase un audiovisual sobre a nosa participación no Festival Intercéltico de Lorient no auditorio da Casa da Cultura de Burela. O acto pecharase cun concerto conxunto das dúas agrupacións.

Calendario ensaios verán

Este é o calendario de ensaios para o mes de xullo, con fin de ultimar a actuación conxunta da Banda de Gaitas Dambara e a Banda de Música de Burela no Festival Intercéltico de Lorient. Se se considera preciso, poderán programarse máis ensaios dos que figuran neste calendario.

Concerto das Letras Galegas 2012

A Banda de Música de Burela ofrecerá un concerto o próximo sábado, día 5, ás 20:30 horas no auditorio municipal, con motivo da celebración das Letras Galegas, que este ano se dedican a Valentín Paz Andrade. O repertorio escollido para este concerto está integrado por algunhas das composicións galegas para banda máis populares, entre as que se encontran clásicos como o pasodobre galego Lugo-Ferrol ou o pasodobre-xota Martiñika, rapsodias sobre motivos galegos como Airiños Aires ou A noite do Santo Cristo, así como unha selección da zarzuela galega Non chores, Sabeliña! Tamén interpretaremos  a Balada Galega (Negra Sombra) de Montes e o pasodobre Burela, composición de Israel Arranz, que foi estreado o pasado ano pola Banda de Burela.

Abaixo podedes ver e descarregar o programa de man completo en formato de fácil leitura.

Agardamos contar coa vosa presenza!

Open publication - Free publishing - More 2012

A Banda nas Quendas o 29 de abril

 

O próximo domingo, 29 de abril, actuaremos na Feira das Quendas, en Mondoñedo. Faremos un pequeno pasarrúas e a continuación daremos un concerto na praza do Concello, ás 18:00 horas. Se o tempo non acompaña, o concerto terá lugar no auditorio municipal "Pascual Veiga".

Convidamos a todos os veciños e veciñas, así como a todos os visitantes que se achegen nese día a Mondoñedo, a este concerto da Banda de Música de Burela.

Mozos de Penedo

Esta será unha das pezas que interpretaremos no Concerto das Letras Galegas. Mozos de Penedo é unha muiñeira de Manuel Novoa, arranxada para banda por José Oro Val, que é interpretada con moita frecuencia polas bandas galegas. Neste vídeo, podedes escoitar esta peza, interpretada pola Banda de Música Cultural de Salceda de Caselas, nun concerto que deron con motivo do seu 25 aniversario, en agosto de 2011.

Próximos ensaios

Actualizamos o calendario de ensaios para os próximos meses, nos que prepararemos o Concerto que daremos con motivo das Letras Galegas. Aínda non temos unha data fixa, aínda que si que será no mes de maio, en torno ao día 17.

No calendario, podedes ver tamén o tipo de ensaios que faremos (seccionais ou xerais), así como os horarios dos mesmos. O 10 de marzo non teremos ensaio, pois haberá un curso de "técnica Alexander" na Escola de Música, organizado pola ASUEMBU. 

Este mesmo sábado continuaremos a traballar o repertorio do concerto. Abaixo tedes un vídeo no que podedes escoitar Lugo-Ferrol, unha das pezas clásicas do repertorio galego para banda, composición de Gregorio Baudot.

Preparando o próximo concerto

Despois do concerto de Reis que demos o pasado día 7, xa estamos a preparar as próximas actuacións da banda, que terán lugar no marco das Letras Galegas e das festas patronais de Burela. Desta volta, as pezas que interpretaremos serán fundamentalmete do repertorio galego, da autoría de compositores como Gustavo Freire, Gregorio Baudot, Hixinio Cambeses ou Pascual Veiga.

Para ir abrindo boca, deixámosvos un vídeo da obra Airiños Aires, do compositor lucense Gustavo Freire, interpretada pola Banda de Música Airiños do Morrazo.

A Banda na semana da mobilidade. Setembro 2011

Deixámosvos as fotos do pasarrúas que deu a Banda de Burela con motivo da semana europea da mobilidade o mes de setembro do pasado ano. As fotografías, como sempre, de Carlos Andrade.

Concerto de Reis 2012. Programa de man.

Disponibilizamos, en formato de fácil lectura, o programa de man do Concerto de Reis da Banda de Música de Burela. Agardamos que sexa do voso interese.

Open publication - Free publishing - More banda

Concerto de Reis 2012

A Banda de música de Burela, que onte participaba na cabalgata de Reis de Burela, xa se prepara para a súa próxima actuación. A Asociación de Amigas e Amigos da Banda de Burela organiza para o próximo sábado, 7 de xaneiro, ás 20:30 horas, no auditorio da Casa da Cultura, un concerto da Banda de Música de Burela. Neste concerto, que xa é tradición por estas datas e que este ano leva por nome "Concerto de Reis", a banda interpretará pezas de concerto do repertorio para banda, pasodobres galegos, bandas sonoras, así como arranxos de obras clásicas e temas modernos para banda.

Desde a Banda de Burela queremos convidar á veciñanza de Burela a este concerto tan especial para nós e que é a nosa tradicional forma de dar a entrada ao ano novo, no que ademais terá lugar a estrea oficial de novos músicos que se incorporaron recentemente á banda.

A entrada, de balde.