Concerto de Ano Novo. Venres 3 ás 20:30 horas

A AABB deséxavos un Bo Nadal e Feliz 2014!

Afro Blue. Gary Burton & Makoto Ozone

Deixámosvos un vídeo dun dos temas que tocaremos as bandas de Burela e Guitiriz no concerto de Ano Novo: Afro Blue en versión do vibrafonista Gary Burton e o pianista Makoto Ozone.

Calendario ensaios Nadal

Outono 2013

O campamento musical organizado pola AABB finaliza este xoves en Ribadeo cun concerto.

Rapaces e rapazas das bandas de Guitiriz e Burela participan nun campamento musical na Devesa, Ribadeo. A Asociación de Amigas e Amigos da Banda de Burela (AABB) é a entidade organizadora deste campamento de cinco días de duración que comezou o domingo 25 e que rematará o próximo xoves, día 29.

É a segunda vez que a AABB organiza un campamento musical destas características, no que se traballan aspectos relacionados coa práctica bandística, a través da interpretación de distintas pezas do repertorio clásico, obras de concerto compostas orixinalmente para banda e pezas do repertorio galego para banda. Tamén hai tempo para o lecer, pois paralelamente ao traballo musical, organízanse actividades lúdicas, xogos, veladas musicais… 

A parte musical deste campamento está coordinada polo director da Banda de Burela, Roberto Bouça (vento madeira), o profesor Israel Arranz (percusión) e polo director da Banda de Guitiriz, Abel Riveira (vento metal). Cóntase tamén cos profesores de apoio Adrián Pereira (trompeta) e Bruno Valle (trombón), así como tamén con dous monitores encargados da realización de actividades lúdicas.

O campamento rematará o próximo xoves, día 29, cun concerto público que terá lugar ás 20:00 horas no Cantón ribadense (no Cine Teatro en caso de choiva). Con esta actuación porase o broche final a este curso lúdico-musical.

Campamento "Ao son da Banda"

Horarios do Campamento "Ao son da Banda". A Devesa, do 25 ao 29 de agosto.

Calendario Verán 2013

Festas de Burela 2013

Fotografías de Carlos Andrade

50 aniversario do CEIP Virxe do Carme en imaxes

Fotografías do acto conmemorativo polo 50 aniversario do CEIP Virxe do Carme, popularmente coñecido como "Colexio dos Castros", que tivo lugar o pasado día 10 de maio. Todas as fotografías son de Carlos Andrade.

A Banda de Burela no 50 aniversario do CEIP Virxe do Carme

A Banda de Burela actuou no acto que tivo lugar este venres no Auditorio Municipal con motivo do 50 Aniversario do CEIP Virxe do Carme, popularmente coñecido como Os Castros. Profesores e profesoras representaron unha obra teatral ambientada nun colexio dos anos 70, na que tamén participou o propio director do centro e que foi moi aplaudida polo público asistente. 

O acto tamén contou cun apartado musical a cargo da agrupación de música clásica Arranz Trío e do cuarteto de jazz Marosa Jazz Project. A Banda de Burela foi a encargada de pór o broche final coa interpretación de pezas do seu repertorio e do Hino ao CEIP Virxe do Carme, composto polo mestre de música do colexio, Jesús Arranz. Aínda que a peza xa fora estreada en 2009 no propio centro para celebrar o día das Letras Galegas, nesta ocasión, con motivo da conmemoración dos 50 anos do nacemento do centro, o Hino interpretouse nunha versión para coro e banda de música, na que os alumnos e alumnas foron os encargados de pór voz ao texto de Arranz, acompañados pola Banda de Música de Burela.

Coa interpretación desta peza púxese punto e final a un acto moi emotivo con grande asistencia de público e no que estiveron presentes profesores e profesoras, alumnos e alumnas, pais e nais de alumnos, antigos mestres e mestras... e ao que a Banda de Burela non podía faltar.

Hino ao CEIP Virxe do Carme

Letra e música de Jesús Arranz

No medio dos Castros naceu unha “escuela”

que, andando no tempo a colexio chegou

deu pulo e alento a toda Burela

desde as súas aulas, cultura espallou

O VIRXE DO CARME É NOSO COLEXIO

O FARO QUE ALUMA NO MEDIO DO MAR

OFRECE UN ENSINO BO E DE CALIDADE

GLOBAL, SOLIDARIO, ABERTO E PLURAL

Burela medraba e o “cole” crecía

e máis edificios houbo que crear

xornais, profes, libros a Burela enchían

de sabiduría e ritmo vital

ADIANTE, ADIANTE CEIP VIRXE DO CARME

OLLANDO AO FUTURO IMOS TRABALLAR

NAS CIENCIAS, NAS LETRAS, EN TODAS AS ARTES

PARA QUE BURELA SIGA A PROGRESAR

A Comunidade do noso colexio

valores humanos pretende acadar

libre e tolerante quere dar resposta

aos retos dun mundo cambiante e plural

Repíntense os retrousos:

O VIRXE DO CARME...

ADIANTE, ADIANTE...

Próximos ensaios

Estes son os ensaios programados para as próximas semanas, nos que prepararemos a actuación no acto conmemorativo do 50 aniversario do CEIP Virxe do Carme, que terá lugar o venres, día 10 de maio, no auditorio da Casa da Cultura de Burela.

Os ensaios seccionais serán acordados en función da disponibilidade das distintas persoas.

A charanga da Banda de Burela no Entroido

A Charanga "@s Verças-tolas", formada por rapaces e rapazas da Banda de Música de Burela participou nos Entroidos de Foz e Burela.

A Charanga da Banda, bautizada como "@s Verças-tolas", comezaba a súa pequena "xira" do Entroido o pasado venres nos institutos e colexios de Burela, onde foron recibidos con grande entusiasmo, especialmente polos máis cativos e cativas. @s Verças-tolas tamén estiveron na festa de Entroido da Escola Infantil de Burela, onde pecharon as actividades que desenvolveron as crianzas durante a mañá.

Por outra banda, a charanga participou no desfile de Entroido de Foz, o pasado sábado, acadando o segundo premio na modalidade pola que concursaba. Tamén estivo no desfile de Burela, o martes de Entroido, onde participou fóra de concurso e a modo de colaboración coa comisión organizadora. Esta actuación ven sumarse a outras que a Banda realiza en Burela ao longo do ano e que tentaremos consolidar en anos posteriores.

 

O traxe escollido pola charanga para este ano estivo inspirado na indumentaria característica dos países celtas, cuxo elemento máis representativo é o kilt (saia a cadros con pregues na parte traseira), popularmente coñecido como saia escocesa. Esta escolla veu motivada pola participación da Banda de Burela, xuntamente coa Banda de Gaitas Dambara no Festival Intercéltico de Lorient, na Bretaña, o pasado verán.

Para a maioría dos rapaces e rapazas, esta era a primeira vez que participaban nunha charanga, aínda que despois desta experiencia admiten que repetirán o próximo ano. Tocar nunha agrupación deste tipo supón dar un enfoque á música moi diferente ao que é habitual na Banda, pois é un cambio radical en canto a repertorio, os estilos e o xeito de interpretar as pezas. Desde un punto de vista pedagóxico acádanse resultados moi satisfactorios, pois os rapaces adquiren habilidades en canto ao traballo da memoria, o oído musical e a intuición. Por outra banda, tamén resulta unha actividade enormemente estimulante e motivadora, dado o seu carácter lúdico.

Ensaios Charanga

Estes son os ensaios que faremos nas próximas semanas para montar o repertorio da charanga da Banda. Comezaremos coas pezas que se repartiron o último día e o próximo sábado entregaranse outras novas.

Lembrade que o próximo sábado, 26 de xaneiro terá lugar a Asemblea Xeral da AABB, ás 19:30 horas.

Deixámosvos as fotos do Concerto de Reis do pasado día 6, no Auditorio Municipal de Burela. Fotografías de Carlos Andrade

CONCERTO DE REIS. PROGRAMA DE CONCERTO

Deixámosvos o programa de man en formato de fácil leitura do concerto que daremos este domingo, 6 de xaneiro, ás 20:00 horas no Auditorio da Casa da Cultura de Burela.

No programa figuran obras de tipo sinfónico, pezas do repertorio galego para banda, arranxos de pezas clásica e un arranxo para banda do grupo vasco Oskorri.

Agardamos que sexa do voso agrado.